Aventura kuqezi në Nations League mbyllet këtu. Kombëtarja shqiptare ra në vendin e fundit të grupit 1 në Ligën B, pikërisht në ndeshjen e fundit, sonte me Ukrainën në shtëpi.
Djemtë tanë nuk ishin në maksimumin e harmonisë në skuadër dhe kjo u duk që në fillim. Loja nisi si mos më keq, duke pësuar dy gola përgjatë 10 minutave të para.
Skuadra mike shënoi dy gola të shpejtë, fillimisht me mbrojtësin Zinchenko dhe më pas me Yaremchuk. Ishte e qartë se kjo ndeshje do të ishte makth për kuqezinjtë, të cilët nuk reaguan në 45 minutat e para.
Në pjesën e dytë fituam pak shpresë. Bajrami shënoi me penallti dhe ngushtoi diferencën, por përpjekjet tona deri në fund nuk u finalizuan. Ukraina fitoi 1-2 në “Air Albania”, kurse ne mbetëm në vend të fundit. Tashmë kemi rënë në Ligën C të Nations League.
