Katër muaj pas lamtumirës së tij nga kombëtarja angleze Gareth Southgate, ish-trajneri i “Tre Luanëve”, ka folur për të ardhmen e tij. “Pas tetë viteve të kaluara në një nga rolet më të dukshme në futbollin botëror, kam marrë një vendim të ndërgjegjshëm për të gjetur kohë për të reflektuar mbi atë që kam përjetuar dhe për të menduar thellë për atë që vjen më pas”, tha Southgate.

“Duke parë pas, ka ndeshje dhe momente që do t’i kujtoj për pjesën tjetër të jetës sime. Stërvitja e lojtarëve në nivelin më të lartë ishte një sfidë që më shtyu të operoja në nivelet më të larta. Pesha e rolit, me përgjegjësinë unike që mbart, është diçka që pakkush në botë ka mundësinë ta përjetojë. Ndoshta gjëja më e vështirë për t’u përsëritur, megjithatë, do të jetë ndjenja e të pasurit një qëllim”, tha Southgate.

“Çdo mëngjes, ndjeva një përgjegjësi për të përmirësuar futbollin anglez. Sa herë që tingëllonte himni kombëtar unë përfaqësoja 50 milionë njerëz, me shpresat dhe ëndrrat e tyre. Kur udhëtoja apo flisja publikisht, kisha për detyrë të isha ambasador i vendit tim. Isha shumë i vetëdijshëm për nevojën për të ruajtur dinjitetin dhe për të demonstruar lidership të fortë. Jo vetëm për lojtarët dhe stafin përreth meje, por edhe për miliona të rinj që mund të gjenin frymëzim dhe shpresë në atë që bëmë”, shtoi trajneri anglez.

Më tej, Southgate shtoi: “Kjo është arsyeja pse unë nuk po i kufizoj opsionet e mia të ardhshme për të mbetur në rolin e trajnerit të futbollit. Jam rehat në këtë kohë “eksplorimi” dhe që nuk i kam të gjitha përgjigjet. Tani për tani, po e gjej qëllimin tim duke i kushtuar më shumë kohë bamirësive që zgjedh të mbështes Unë nuk jam i vetmi 50-vjeçar që mendoj për një ndryshim në drejtim”.