Andrea Cambiaso, një nga lojtarët më në formë të Juventus këtë sezon, rrezikon të mos luajë për badhezinjtë në ndeshjen ndaj Manchester City kotë mesjavë, në Champions League.

Anësori i Juventus, i cili u zëvendësua për shkak të dëmtimit gjatë pjesës së parë të ndeshjes së kampionatit kundër Bolonjës, pësoi një tendosje të ligamentit kapsulë, në kyçin e këmbës së majtë.

Një dëmtim disi më i lehtë krahasuar me atë që pritej, por që detyron trajnerin Thiago Motta të studiojë një formacion të ri për ndeshjen ndaj “citizens”. Prania e tij duket e vështirë, por jo e pamundur.

Siç raportohet në buletinin mjekësor të Juventusit, gjendja e lojtarit dhe kyçi i këmbës së tij do të vlerësohen ditë pas dite. Gjithsesi, nuk ka siguri për kohën e rikuperimit dhe rikthimin e tij në fushë. 

Një lajm i mirë vjen nga Douglas Luiz: mesfushori brazilian, i cili mungon që nga fundi i tetorit për shkak të një problemi muskulor, u stërvit me grupin të dielën në mëngjes dhe është rikuperuar për Manchester City.