Paris Saint-Germain po përjeton një krizë rezultatesh në Champions League, ndërkohë që kanë mbetur edhe tri ndeshje për t’u luajtur në fazën e grupeve. Pas paraqitjeve të dobta ndaj Arsenal, PSV dhe Atletico Madrid, skuadra është e detyruar të fitojë sot ndaj Salzburg për të mbajtur gjallë shpresat.

“Formula për të dalë nga ky moment është shumë e qartë: Duhet të fitojmë, duhet të krijojmë më shumë raste se kundërshtari dhe të shënojmë më shumë se ai. Duhet të pësojmë sa më pak gola, në mënyrë që kundërshtarët të kenë më pak mundësi të rivalizojnë me ne”, tha trajneri i PSG, Luis Enrique.

“Statistikat tona janë shumë të mira, ndaj duhet të ruajmë besimin dhe të këmbëngulim. Duhet edhe pak durim, por unë jam i sigurtë se do të kualifikohemi dhe do të shkojmë shumë përpara”, u shpreh trajneri spanjoll, që ka besimin e klubit edhe në rast se eliminohet nga turneu europian.