Fitorja në minutat shtesë ndaj Barcelonës ka gëzuar pa masë lojtarët e Atletico Madrid, që shijojnë jo vetëm këtë triumf por edhe kryesimin e La Liga. Mes golashënuesve të “colchoneros” ishte edhe një nga “ushtarët” e trajnerit Diego Simeone, Rodrigo De Paul.

Mesfushori argjentinas nuk e mohon që po shijon golin, fitoren e kryesimin: “Kur vuani më shumë, kënaqeni më shumë kur fitoni ndeshje të tilla. U përballëm me një rival të madh. Ne luanim për kreun e La Liga dhe kjo fitore është rezultati i punës së madhe që po bëjmë”.

“Për të luajtur këtë lloj ndeshjeje duhet të jesh gati për të luajtur dhe të vuash. Jam shumë i lumtur për të gjithë ekipin. Natyrisht ka entuziazëm sepse jemi në krye. Ka kënaqësi kur puna dhe mundi shpërblehen”, tha De Paul.

Në fund, mesfushori argjentinas shtoi: “Jam shumë i lumtur që jam te Atlético. Është nder të vesh këtë fanellë. Më jep gëzim që gjërat po shkojnë mirë. Shpresoj që njerëzit tashmë po festojnë në Madrid”.