Inter aktualisht është plotësisht i fokusuar në një sezon që mund të dhurojë shumë kënaqësi, por nga ana tjetër klubi është duke punuar për të ndërtuar një ekip edhe më të fortë sezonin e ardhshëm. Objektivi kryesor është ruajtja e konkurrencës së lartë pa rënduar tepër në llogaritë e kompanisë. Nga ky këndvështrim, një nga repartet që mund të pësojë një lloj revolucion gjatë verës është mbrojtja.
Për momentin Bisseck, Bastoni dhe Pavard janë të paprekshmit, ndërsa ka shumë pasiguri për të ardhmen e Stefan De Vrij dhe Francesco Acerbi. I pari, 33-vjeç, ka një kontratë që skadon në qershor me mundësi zgjatjeje për një vit.
Ndërsa Acerbi mbushi 37 vjeç dhe këtë vit i është dashur të përballet me një sërë problemesh fizike, duke grumbulluar 19 paraqitje deri tani mes Serie A dhe Champions League. Kontrata e tij skadon në vitin 2026, por mund të ketë një lamtumirë këtë verë.
Të paktën njëri nga të dy mund t’i thotë lamtumirë klubit “zikaltër” sepse Marotta dhe Ausilio kanë filluar tashmë të ecin drejt një sërë objektivash, veçanërisht në skanimin e tregut vendas.
I pari në listë është Isak Hien i Atalantas, i cili zbarkoi në Bergamo në janar 2024 dhe u bë shpejt një shtyllë e mbrojtjes së Gasperinit. Sigurisht, kjo është edhe lëvizja më e komplikuar: kontrata e tij skadon në vitin 2028, ai është në pronësi të një konkurrenti të drejtpërdrejtë dhe vlerësohet të paktën 30 milionë euro.
Alternativat nuk mungojnë dhe në listë janë Bijol nga Udinese, Gila nga Lazio, Beukema nga Bolonja dhe Idzes nga Venezia. Të gjithë të moshave nga 24 deri në 26 vjeç, pra të rinj, por me përvojë në Serie A dhe mjaft të gjithanshëm në një nivel taktik. Profilet ideale për një ekip që sigurisht nuk ka nevojë për revolucion, por që synon më shumë se çdo gjë uljen e moshës mesatare.
