Vazhdon të komentohet barazimi spektakolar 3-3 i së mërkurës mbrëma në Montjuïc, mes Barcelonës dhe Interit, ndeshja e parë gjysmëfinale e Ligës së Kampionëve. Mesfushori armen i zikaltërve, Henrikh Mkhitaryan, foli për “TNT Sport”:

“Ishim të bindur se mund të bënim më mirë. Nuk është e lehtë të luash kundër Barcelonës, një skuadër shumë e fortë, e re dhe plot talent. Katalanasit e menaxhojnë shumë mirë zotërimin e topit dhe dinë të luajnë.

Ne dhamë gjithçka. Ndoshta mund të kishim bërë pak më shumë, por nuk ishte e thjeshtë. Trajneri na tha vetëm ta mbajmë kokën lart dhe të vazhdojmë kështu, sepse po bëjmë mirë. Pikërisht kjo ka më shumë rëndësi”.

Në “San Siro”, a mendoni se mund të kualifikoheni?
Sigurisht, kjo është ajo që shpresojmë, do të japim maksimumin. Natyrisht, nuk do të jetë e lehtë, sepse kemi humbur kapitenin tonë, liderin tonë, Lautaro Martínez. Sidoqoftë, duhet të përpiqemi të japim më të mirën, edhe për ta zëvendësuar, edhe për të luajtur për të.