Xavi Hernandez mund të fillojë një kapitull të ri në karrierën e tij si trajner, por këtë herë në anën tjetër të Atlantikut. Pas largimit të tij nga Barcelona dhe qëndrimit “pushim” për këtë sezon, ​​trajneri katalanas është vënë në shënjestër nga Rayados de Monterrey.

Klubi meksikan është në kërkim të një figure me famë ndërkombëtare për të udhëhequr ekipin e tyre në Kupën e Botës për Klube, kompeticion i cili zhvillohet këtë verë, për herë të parë në këtë format. Statura e Xavit, me përvojën dhe stilin e tij të lojës, duket se i përshtatet shumë mirë klubit meksikan, i cili synon të surprizojë në Botërorin e Klubeve dhe jo të jetë thjesht një ekip pjesëmarrës.

Kujtojmë se pjesë e Rayados de Monterrey është edhe Sergio Ramos, ku mbrojtësi vetersan spanjoll është kthyer në protagonist në sezonin e tij të parë në Meksikë dhe mund të jetë shtysë më tepër për Xavi-n për të marrë drejtimin e këtij klubi. Rayados de Monterrey është në grup me Interin, River Plate dhe japonezët e Urawa Red Diamonds.