Ish-boksierët Mike Tyson dhe Floyd Mayweather kanë rënë dakord për të zhvilluar një duel “show” mes tyre në pranverën e vitit 2026. Lajmi i përballjes së tyre ka befasuar të gjithë opinionin sportiv.
Bëhet fjalë për dy nga legjendat e të gjitha kohërave në boks, prej vitesh të tërhequr nga sporti, që do të përballen në një sfidë që është përshkruar si “një nga ngjarjet më të rëndësishme të historisë së boksi”.
“TMZ Sports” ishte i pari që raportoi lajmin, duke shtuar se dyshja kishte nënshkruar tashmë kontratën për duelin, megjithëse ende nuk është njoftuar asnjë datë ose vend.
“Kjo sfidë është diçka që askush në botë nuk e kishte menduar ndonjëherë se do të ndodhte” tha Mike Tyson për TMZ. “Megjithatë, boksi ka hyrë në një epokë të re, të paparashikueshme. Ky duel është aq i paparashikueshëm sa mund të jetë”, tha më tej ai.
“Ende nuk mund ta besoj që Floyd dëshiron ta bëjë vërtet këtë. Do të jetë e dëmshme për shëndetin e tij, por ai dëshiron ta bëjë, kështu që është nënshkruar. Dhe po ndodh“, tha më tej Mike Tyson, referuar faktit se dy boksierët kanë konkurruar në pesha të ndryshme.
Ish-kampioni dy herë i botës në peshat e rënda, Tyson (50-7, 44 fitore me KO), u tërhoq nga boksi profesionist në vitin 2005, në të njëjtin muaj kur Mayweather sapo kishte siguruar titullin botëror në kategorinë e tij të tretë të peshës “super të lehtë” duke ndaluar Arturo Gatti për kurorën WBC.
Tyson u angazhua në një ndeshje tetë-raundëshe me anëtarin tjetër të Sallës së Famës, Roy Jones Jr., në nëntor 2020. Dëshira me sa duket mbeti, pasi ai u rikthye në një ndeshje të sanksionuar kundër Jake Paul nëntorin e kaluar, duke pësuar një humbje pikësh tetë-raundëshe.
Mayëeather i dha fund karrierës së tij të shkëlqyer pasi ndaloi ish-kampionin e dy divizioneve të UFC, Conor McGregor, për të përfunduar një rezultat perfekt 50-0 në gusht 2017, megjithëse ai gjithashtu është angazhuar në disa ndeshje të tilla “show” që atëherë.
Mendimi optimist pas Tyson-Mayweather është se do të jetë një spektakël më i mirë duke pasur parasysh se janë më afër në moshë.
Nuk ka detaje rreth një peshe të kontraktuar. Ka më shumë se një diferencë prej 40 kilogramësh midis tyre. Tyson peshonte 110 kg kundër Paul, ndërsa Mayweather arriti 74 kg në ndeshjen e tij të fundit kundër John Gotti III në gusht të vitit të kaluar.
Asgjë nga këto nuk duket se e shqetëson 48-vjeçarin, i cili u citua të ketë thënë: “E kam bërë këtë për 30 vjet dhe nuk ka pasur asnjë luftëtar që mund të njollosë trashëgiminë time. Ju tashmë e dini se nëse do të bëj diçka, do të jetë e madhe dhe legjendare. Unë jam më i miri në biznesin e boksit. Kjo shfaqje do t’u japë tifozëve atë që duan.”
