Tyson Fury do të finalizojë përgatitjet për përballjen e tij të madhe ndaj Anthony Joshua duke u ndeshur me Mariusz Wach në Tajlandë, më 24 korrik. Dueli është zyrtarizuar orët e fundit, me Fury që do të ndeshet me polakun 46-vjeçar në stadiumin Max Muay Thai në Pattaya.
Kjo sfidë do të zhvillohet një ditë para përballjes së 25 korrikut, ku Joshua do të përballet me shqiptarin Kristian Prenga. Prej kohësh përflitet se Joshua dhe Fury do të ndajnë më në fund ringun këtë vit, megjithëse një vend dhe një datë për ndeshjen e madhe ende nuk janë finalizuar.
“Viti 2026 është një vit historik për mua në boks dhe jam i emocionuar që mund ta sjell këtë ngjarje në Pattaya, një pjesë të botës që është e veçantë për mua“, tha Fury. Më tej, ai shtoi: “Po mblidhemi së bashku për të dhënë një shfaqje të shkëlqyer për tifozët, duke përdorur mundësinë për t’i dhënë mbrapsht komunitetit vendas, i cili ka qenë kaq i mirë me mua sa herë që kam vizituar”.
“Në të njëjtën kohë, jam plotësisht i përqendruar në përgatitjen për një kundërshtar të fortë dhe për t’u siguruar që jam versioni më i mirë i Tyson Fury para natës së ndeshjes. Është fillimi i një gjysmë të dytë të madhe të vitit për mua“, deklaroi Tyson Fury.
Rekordi prej 52 ndeshjesh në karrierën e Wach prej 39-13 (20 KO) përfshin humbjet ndaj Hughie Fury, kushëririt të Tyson, boksierëve britanikë të peshave të rënda Moses Itauma dhe Dillian Whyte, si dhe një humbje në vitin 2012 ndaj kampionit të unifikuar të peshave të rënda Wladimir Klitschko.
