Pedro León, aktualisht lojtar i Real Murcia CF, kujtoi në emisionin “El Cafelito” konfliktin e famshëm që pati me Jose Mourinhon gjatë periudhës së tij te Real Madridi. León iu përgjigj deklaratës së njohur të Mourinhos (“flisni për të sikur të ishte Zidane apo Maradona”) duke thënë: “Do të jem i sinqertë, nuk më dhembën ato fjalë. Ajo që më dhembi ishte të mos e dija pse ndodhi. Edhe sot nuk e di arsyen”.

Ai hodhi poshtë pretendimet se Mourinho ishte zemëruar me të për shkak se nuk ishte ngrohur siç duhet në një ndeshje kundër Levantes: “Mund ta shikoni atë ndeshje, nuk bëra asnjë gjest mosrespektimi, asgjë”.

“E kam falur Mourinhon. Ndoshta, nëse gjërat do të kishin shkuar ndryshe, karriera ime do të kishte qenë tjetër, por nuk i mbaj mëri”, – shtoi ish-lojtari i Levante, Valladolid, Getafe, Real Madrid, Éibar dhe Fuenlabrada. León shtoi se e ka pasur rastin të luante kundër Mourinhos, por kurrë nuk janë takuar personalisht: “A na mungon një kafe mes nesh? Jo. Ai është mirë në Portugali, unë jam mirë në Murcia”.