Në Formula 1 të gjithë prisnin që Red Bull të kishte vështirësi me motorin, duke pasur parasysh debutimin e tij në sipërmarrjen e tij “të pavarur” me Ford. Por, ditët e para të testimit zyrtar, zbuluan një paketë interesante, me një njësi fuqie të aftë për të shtyrë fort.
Problemi fillestar lindi me shasinë, me Isack Hadjar që u la plotësisht jashtë loje për shkak të një rrjedhjeje hidraulike. Asgjë për t’u shqetësuar, pasi Max Verstappen ndihet i kënaqur me paketën e re, veçanërisht me një njësi fuqie që nuk i ka dhënë asnjë problem deri më tani.
“Nuk e di se ku ndodhemi. Është e pamundur ta dish sepse nuk e di as nëse rivalët e tu po ecin me shpejtësi të plotë apo jo. Është gjithmonë shumë e vështirë për mua të them diçka për testimin. Jemi përqendruar te vetja, duke u përpjekur të bëjmë shumë xhiro dhe të mos kemi probleme. Dhe kjo ishte pozitive”, tha Verstappen.
“Është emocionuese të garosh si inxhinier i ri motori, duke parë makinën e re dhe njësinë e re të fuqisë së bashku. Është sikur të jenë foshnje. Ka ende shumë për të mësuar, por të paktën mendoj se po shkojmë në drejtimin e duhur”, shtoi 4 herë kampioni i botës në Formula 1.
Më tej, ai tha: “Sigurisht, ka ende gjëra që duam të përmirësojmë, nuk mendoj se do të jemi ndonjëherë të kënaqur. Por të paktën nuk ka avari dhe nuk mendoj se dikush e priste këtë. Kemi bërë shumë xhiro pa probleme të mëdha. Dhe ky ishte qëllimi ynë: të kuptojmë vërtet këto rregulla, motorin dhe makinën, duke u siguruar që gjithçka është e besueshme”.
“Është një proces i vazhdueshëm mësimi. Atmosfera është e mirë edhe pas problemit të Isack. Po punojmë me rregulla të reja, kështu që i kushtohet shumë vëmendje detajeve dhe ka ende shumë gjëra që duhet të zgjidhim. Është gjithçka shumë komplekse dhe jam i sigurt se do të ketë shumë gjëra për të zgjidhur që në fillim të sezonit”, tha holandezi.
