Disa pilotë të Formula 1 filluan karrierën e tyre të shtyrë nga një pasion për garat që ishte thellësisht i rrënjosur në familjen e tyre. Kjo atmosferë ishte e dukshme edhe në familjen Antonelli, ku babai i Kimi, Marco, është pilot përveçse menaxhon ekipin Antonelli Motorsport GT.
Ky burrë, siç rrëfen lideri aktual i kampionatit botëror të F1, kontribuoi në rritjen e 19-vjeçarit përmes kategorive të të rinjve derisa arriti te Mercedes. Megjithatë, dëshira e tij për ta sjellë të birin në botën e sporteve motorike ka hasur pengesa serioze.
“E gjitha ishte falë babait tim”, tha Antonelli për hyrjen e tij në botën e garave. “Ai ishte pilot dhe është ende. Ai e ka menaxhuar ekipin e tij për shumë vite dhe ishte ai që më prezantoi me sportet motorike. Që në moshë të re, kaloja kohë me të në pistë gjatë fundjavave të garave të tij dhe që atëherë fillova të zhvilloj një pasion për sportet motorike”, tha Antonelli.
“Të them të drejtën, ai nuk donte që unë të garoja fillimisht, sepse e di sa fantastik mund të jetë sporti motorik, por në të njëjtën kohë, sa brutal mund të jetë. Ai gjithashtu e ka përjetuar anën brutale të sporteve motorike nga afër dhe nuk donte që unë të vuaja prej tij. Ai nuk donte që unë të dekurajohesha shumë nga kohërat e vështira dhe gjëra të tilla, kështu që donte të më mbronte në një farë mënyre“, shtoi piloti i Mercedes.
Megjithatë, ideja e Antonelli Sr. ndryshoi pasi pa pasionin gjithnjë e në rritje të të birit për garat: “Ai e kuptoi se isha vërtet i apasionuar pas kësaj. Nuk kishte pse të këmbëngulte. Unë isha ai që shtyva, dhe atëherë e kuptoi se ndoshta do të bëhesha pilot”.
“Gjithçka filloi falë familjes Minardi, e cila i dërgoi një mesazh Toto Wolff. Sigurisht, Toto ishte i interesuar dhe në fund të vitit 2017, ai dërgoi Gwen Lagrue, drejtuesen e programit të të rinjve, e cila pa potencial dhe vendosi të më lejonte të bashkohesha me Akademinë”, kujton Antonelli.
Në fund, ai tha: “Ky ishte një moment i jashtëzakonshëm. Mbaj mend që isha në makinë me babanë tim dhe mora telefonatën nga Toto. Ishim bashkë dhe ajo telefonatë kishte të bënte me bashkimin tim me programin. Mendoj se ishte një moment vërtet i veçantë.”
