Sulmuesi Nicolas Jackson do të mungojë në dy ndeshjet e fundit të Chelsea në Premier League, pasi u ndëshkua me karton të kuq. Një mungesë e rëndësishme kjo për trajnerin Enzo Maresca, që do të luajë pa sulmuesin kryesor në përballjet ndaj Manchester United dhe Nottingham Forest.
Ndërkohë që, “blutë” e Londrës janë në mes të një beteje të ashpër për një vend në Champions League sezonin tjetër. Cole Palmer ka luajtur në atë pozicion, madje edhe Pedro Neto, kur Jackson u lëndua në fillim të këtij sezoni.
“Ajo që duhet të bëjmë në këto momente është të shmangim të tilla situata pezullimesh. Sot kam nevojë për të gjithë skuadrën në dispozicion për ndeshjen e ardhshme”, tha trajneri italian i Chelsea.
“Por kjo ndodhi, Jackson do të jetë jashtë për pjesën tjetër të sezonit dhe shpresojmë se ai mund të mësojë për të ardhmen. Sezoni për të ka përfunduar dhe zëvendësuesi ideal i tij, Marc Guiu, është I dëmtuar prej 3 muajsh. Duhet të gjejmë një zgjidhje tjetër për dy ndeshjet e fundit. Të dyja janë ndeshje të rëndësishme”, tha Maresca.
