Gavi ka hedhur një hap shumë të rëndësishëm në rrugën e rikuperimit. Mesfushori andaluzian i Barcelonës, i ndalur që nga gushti i kaluar pas një artroskopie për riparimin e dëmtimit në menisk, ka rifilluar stërvitjen me topin të hënën. Ndërkombëtari spanjoll, 21 vjeç, me vetëm 66 minuta të luajtura këtë sezon, e shprehu hapur gëzimin e tij në rrjetet sociale: “Sa kënaqësi të stërvitem sërish me topin pas kaq shumë kohe!”

Rikthimi në fushë duket gjithnjë e më pranë, edhe pse ende nuk ka një datë të saktë, siç raporton “Marca”. Kujdesi mbetet thelbësor, duke pasur parasysh historinë e dëmtimeve serioze, përfshirë këputjen e ligamenteve të kryqëzuara në sezonet e mëparshme.

Trajneri Hansi Flick theksoi qasjen graduale: “Do ta ndjekim hap pas hapi dhe do ta mbështesim që të rikthehet në formën maksimale”. Barcelona e llogarit Gavin, për ta pasur rolin kyç në mesfushë, në fazën finale të sezonit.