Argjentina ka emëruar 80-vjeçarin Cesar Luis Menotti si drejtor të ekipeve kombëtare, ka bërë të ditur këtë javë Federata Argjentinase e Futbollit (AFA).
Menotti, i cili ishte trajneri i parë që shpalli Argjentinën kampione bote, në vitin 1978, do të mbikëqyrë planin 10-vjeçar që synon të gjejë "identitetin futbollistik" të Argjentinës, pas krizës së thellë të viteve të fundit.
"Menotti do të nisë punë në 1 shkurt. Në ditët e ardhshme do të takojë stafin drejtues të kombëtares së meshkujve, për të organizuar punën për të ardhmen", informon AFA, në lidhje me ish-trajnerin legjendar, i cili ka drejtuar edhe Barcelonën, Atletico Madridin dhe Meksikën.
Për momentin Argjentina drejtohet nga Lionel Scaloni, i cili do të qëndrojë në drejtim deri në fund të Copa America këtë verë, në Brazil.
MARADONA – Kur Menotti shpallte Argjentinën kampione bote në 1978, Diego Maradona ishte ende në hapat e para të karrierës, por për El Pibe de Oro kthimi i Menottit është lajmi më i madh i mundshëm për futbollin argjentinas.
"Lajmi që Flaco Menotti do të komandojë federatën Argjentinase më jep shumë kënaqësi. Më në fund presidenti Tapia e kuptoi. Kërkoj vetëm që Menotti të ketë ende forcë për të udhëhequr futbollin argjentinas, sepse ai e di si ta bëjë. Nëse Flaco është i fortë, futbolli argjentinas do jetë i fortë. Para 45 vitesh ai ndryshoi drejtimin e një vendi që e quante veten 'kampionët moralë'. Ai na bëri të vrapojmë më shpejt se Gjermania dhe të luanim si brazilianë. Flaco, të dua me shpirt dhe të uroj më të mirën e mundshme!", shkruan Maradona, në një postim në Instagram.