Conor McGregor nuk ka ndërmend të bëjë paqe me Khabib Nurmagomedov. Një vit pas duelit mes tyre, fituar nga Khabib me “submission”, irlandezi ka thumbuar sot sërish rusin. “Nuk e kuptoj se përse nuk dëshiron të duelojë në Moskë. A është rus apo jo? Për këtë unë nuk jam aspak i sigurt”, u shpreh McGregor.

Më tej, irlandezi vazhdon: “Nuk e kam parë kurrë të mbajë me vete flamurin e vendit të tij, atë rus, ashtu sikurse unë mbaj gjithnjë me vete flamurin irlandez. Ai i shmanget një dueli në Moskë, një sfidë që e duan të gjithë, madje edhe babai i tij”, tha McGregor.

“E vërteta është se ai nuk preferon të rrezikojë. Khabib është një njeri që i eviton risqet, ndaj nuk ka për të fituar kurrë asgjë të rëndësishme në jetën e tij. Në duelin e fundit fitoi ndaj një ish-sportisti në peshën pupël pas 3 raundesh, ndërsa unë e munda pas 90 sekondash”, tha McGregor.

Irlandezi nuk ndalet në akuzat ndaj Khabib, kampion bote në peshën e lehtë: “Është në natyrën e një Dagestani që të ikë gjithnjë. Këtë gjë e dinë edhe çeçenët. Dhe Khabib bën të njëjën gjë. Ai mund të ikë gjithnjë, por nuk ka për t’u fshehur. Një përballje e dytë mes nesh është e paevitueshme. Tani mbajeni mendjen tek unë. Rikthim im në kafaz pas 12 javësh”, tha McGregor, që do të duelojë sërish më 18 janar.