Trajneri i Gjermanisë, Julian Nagelsmann, gjatë prezantimit të 26 lojtarëve të grumbulluar për Botërorin 2026, foli gjerësisht mbi rikthimin e Manuel Neuer në kombëtare, pas tërheqjes së shpallur dy vite më parë.
“Kur përzgjedh një skuadër, kërkon gjithmonë lojtarët më të mirë. Për portierët, zgjedh tre më të mirët. Prandaj vendosëm ta pyesnim Neuer nëse kishte dëshirë të luante sërish për kombëtaren. Patëm shumë diskutime me të dhe me stafin. Të gjithë e dimë karizmën e Manuel dhe çfarë sjell në ekip, ai ka një aurë speciale. Ka vendosur të marrë pjesë në një tjetër turne dhe po planifikojmë që të jetë numri ynë një”, – deklaroi Nagelsmann.
Më pas ai foli për Oliver Baumann: “Vendimi ishte një goditje e rëndë për të, por e përgëzoj për sezonin shumë të mirë. Situata ndikoi disi në raportin tonë, megjithatë ai u vu në dispozicion të ekipit”. Nagelsmann konfirmoi gjithashtu se Jonas Urbig do të udhëtojë me skuadrën në SHBA vetëm për stërvitje.
