“Planeti futboll” po konvergon drejt një përgjigjeje të vetme: Lamine Yamal është lojtari i ri më i fortë në botë. Së shpejti do të zhduket edhe mbiemri “i ri”; sepse do të jetë thjesht më i miri.
Pyetja tjetër, që në këto orë jehon në korridoret e “Appianos”, mbetet pa përgjigje.
Shpresohet të mos jetë e pazgjidhshme: si mund të ndalet Yamal, ylli rreth të cilit rrotullohet kualifikimi për në finalen e madhe të Mynihut? Barça nuk është vetëm Lamine, është e vërtetë, por nëse 40% e sulmeve kalojnë nga krahu i tij, balanca e rrezikshmërisë anon dukshëm.
Rregulli i parë: t’i lihen hapësira minimale, por ndoshta as kjo nuk mjafton. “Trinia” Bastoni-Dimarco-Mkhitaryan do të duhet të bëjë sakrifica ekstreme. Mjafton një lexim i gabuar me disa centimetra për të shpërthyer “katastrofa” prej 17-vjeçarit blaugrana.
Bastoni dhe Dimarco, ky i fundit në vështirësi të madhe në “Montjuic”, tashmë janë përballur me Yamal në mënyrë të pafat në Europianin e fundit. Ditën kur Nico Williams tërboi Di Lorenzon, duke mbuluar pjesërisht edhe lëvizjet e Lamine, talenti i Barcelonës shkëlqeu në anën tjetër të fushës, gjithsesi.
Pra, sonte do të kërkojnë revansh Bastoni dhe Dimarco. I pari, teorikisht, ka më shumë energji. 90 minuta në stol ndaj Veronës, titullar në Barcelonë, por i pezulluar disa ditë më parë kundër Romës.
Më i lodhur duket Dimarco, por është menaxhuar. Vetëm 21 minuta ndaj Hellas Verona, kundër të cilës shkëlqeu Carlos Augusto. Një titullar shtesë, një armë më shumë për Inzaghin, që po rikuperon edhe Mkhitaryan më të mirë.
Armeni do të duhet ta trefishojë presionin ndaj yllit spanjollit, pa harruar edhe rolin e tij si mesfushor depërtues. Një nga senatorët, gati për të luajtur ndeshjen e jetës kundër lojtarit më të mirë në botë.
Si priten të luajnë të dyja skuadrat, formacionet e mundshme
Pas barazimit 3-3 në ndeshjen e parë, Interi dhe Barcelona përballen sërish në gjysmëfinalen e kthimit të Ligës së Kampionëve. Zikaltërit synojnë të rikthehen në finalen e madhe tri vite pas Stambollit, ndërsa për blaugranat, të cilët të dielën do të luajnë një “El Clasico” vendimtare për titullin e La Liga-s, mungesa në një finale Champions-i daton që nga viti 2015. Ndeshja do të zhvillohet në një “San Siro” të mbushur plot, prej orës 21:00. Gjyqtar kryesor do të jetë Szymon Marciniak (Poloni).
Gjendja e Interit – Pavard mbetet jashtë kësaj ndeshjeje, pasi nuk u rikuperua dot nga lëndimi, ndërsa dyshimet e mëdha i ka larguar Lautaro Martinez, i cili pritet të jetë titular. Zgjedhjet e Simone Inzaghit duket se shkojnë në këtë drejtim, por vendimi i fundit do të jetë i kapitenit zikaltër. Në vend të francezit pritet të luajë, ashtu si në ndeshjen e parë, Bisseck, me Acerbi dhe Bastoni para Sommerit. Mesfusha pritet të jetë ajo klasike, me Dumfries dhe Dimarco në krahë, Barella dhe Mkhitaryan anash Calhanoglu. Nëse Lautaro nuk ia del, përkrah Taremit do të luajë Thuram.
Gjendja e Barcelonës – Hansi Flick rikuperoi Lewandowskin, por duhet të bëjë pa Balde dhe Koundé. Në ndeshjen e parë, Gerard Martin nuk bindi, prandaj pritet që Inigo Martinez të spostohet në të majtë, me Eric Garcia në të djathtë dhe dyshen Araujo-Cubarsi në qendër, përpara Szczesny. Sulmuesi polak, përveç ndonjë surprize, do ta nisë nga stoli. Do të konfirmohet skema sulmuese e përdorur në “Montjuic”, me Pedrin dhe De Jong në mesfushë, Dani Olmon pas treshes sulmuese, e përbërë nga Lamine Yamal, Ferran Torres dhe Raphinha.
