Një skandal po përfshin aktualisht ekipin norvegjez të kërcimeve me ski për meshkuj, pjesëmarrës një muaj më parë në Kampionatin Botëror të Skive Nordike. Drejtori sportiv i ekipit skandinav pranoi se ekipi kishte përdorur kostume të modifikuara që nuk përputheshin me rregulloret.

Për pasojë, skiatori Marius Lindvik, i cili kishte fituar medaljen e artë në atë disiplinë dhe kolegu i tij Johann André Forfang, i cili doli i pesti, u skualifikuan përpara ceremonisë së medaljeve.

Skandali për kostumet e modifikuara shpërtheu kur televizioni gjerman ARD transmetoi drejtpërdrejt në TV anëtarë të stafit teknik të Norvegjisë duke hequr mikroçipet e identifikimit nga kostumet zyrtare dhe duke i bashkangjitur ato me të tjerët.

Më pas u mësua se ato kishin tela të përforcuar dhe material të ngurtë në zonën e këmbës për të përmirësuar aerodinamikën dhe shpejtësinë gjatë fluturimit. Vetë Magnus Brelvig, trajneri i ekipit, u filmua duke mbikëqyrur operacionin.

Të gjitha skuadrat e tjera apeluan, duke rezultuar në skualifikimin e Lindvik dhe Forfang, me Jan-Erik Aalbu, drejtori konkurrues i skuadrës norvegjeze, i detyruar të pranojë në një konferencë shtypi: “Ne mashtruam dhe nuk mund të jetojmë më me këtë barrë“.

Në Norvegji, e cila ka akumuluar 26 skualifikime në Kupën e Botës dhe Kampionatin Botëror në kërcim me ski dhe Nordike të kombinuara këtë sezon (pesë medalje të fituara në këto kampionate botërore), skandali ka gjeneruar turp, me pasoja të pritshme në kontratat e sponsorizimit të nënshkruara.