Brittney Griner, basketbollistja amerikane e Phoenix Mercury në WNBA, do të përpiqet të drejtojë ekipin e ëndrrave të femrave në Lojërat Olimpike “Paris 2024”, një vit pasi u dënua në Rusi me nëntë vjet burg për posedim dhe kontrabandë droge. Ajo është gati të përjetojë Olimpiadën e tretë të karrierës së saj, por këtë herë do të ketë një shije tjetër për të.
Ndryshe nga Tokio, ku Olimpiada u zhvillua pa tifozë, ajo do të takojë publikun në tribuna. Por, mbi të gjitha, ylli i WNBA do të mund ta bëjë këtë si një grua e lirë. Basketbollistja amerikane në fakt ka përjetuar një ferr të gjatë në Rusi ku në vitin 2022 u arrestua dhe u dënua me nëntë vjet burg për posedim dhe kontrabandë droge.
E ndalur në aeroportin e Moskës me akuzën se mbante vaj hashashi në bagazhin e saj, lojtarja e Phoenix Mercury kaloi dhjetë muaj në burgjet e Moskës përpara se të lirohej si pjesë e një shkëmbimi të burgosurish dhe të mund të kthehej në vendin e tij ku tani do veshë fanellën me numrin 15, e vendosur për të fituar medaljen e tretë të artë në karrierë.
“Sinqerisht, ky event do të thotë gjithçka për mua. Të kesh nderin të vesh ngjyrat e SHBA-së dhe potencialisht të fitosh medaljen e artë është qershia mbi tortë”, tha Griner, në udhëtimin e saj të parë jashtë Amerikës që pas kthimit nga Rusia. Ajo synon që himni i Amerikës të tingëllojë në shkallën më të lartë të podiumit në Paris, e bindur se mund të tregojë edhe një herë të gjithë talentin e saj në parket.
