Giovanni Malagò komentoi rikthimin e Roberto Mancinit në stolin e Italisë, duke u ndalur edhe te dorëheqja e tij në vitin 2023. “Më pyesni nëse është marrë parasysh e kaluara e Mancinit? Sigurisht. Fakti që Roberto kërkoi falje ka qenë shumë i rëndësishëm. Kjo është edhe një nga bazat e konferencës së të mërkurës. Është e qartë se janë bërë të gjitha vlerësimet e mundshme”

Presidenti i FIGC-së deklaroi se dita e martë ishte pozitive për futbollin italian, duke shmangur polemikat me ministrin e Sportit, Andrea Abodi: “Kush ka dalë keq? Sot e konsideroj një ditë të bukur për futbollin. Çfarëdo që them keqinterpretohet. Dua të ndalem me kaq”.

Duke folur për Antonio Conten dhe Giorgio Chiellinin, Malagò tha: “Conte është trajner me një histori që flet vetë. Kam një marrëdhënie shumë të mirë me të, por sot realiteti është ndryshe nga dje. Tani kemi një trajner dhe një president të kombëtares italiane. Pikërisht për këtë arsye u ndanë rrugët me Maldinin dhe Leonardon. Ideja ka qenë gjithmonë Mancini dhe Ranieri”.

Për Chiellinin shtoi: “Për respekt ndaj klubeve të Serie A, që më kanë mbështetur, nuk marr njerëz që punojnë aktualisht në to. Për këtë arsye nuk mora në konsideratë as emra të tjerë të rëndësishëm”.

Malagò pranoi gjithashtu se ishte ai që ndaloi emërimin e Andrea Pirlos: “E marr unë përgjegjësinë që e ndalova procesin e emërimit të Andrea Pirlos. Për një sërë arsyesh dhe çështjesh oportuniteti, nuk ndjeva ta çoja përpara”.

Ai njoftoi se deri në fund të javës do të emërohet edhe një figurë e tretë, e cila do të ketë rolin e drejtuesit të kombëtareve, si dikur Gigi Riva dhe Gigi Buffon, si edhe do të koordinojë ekipet e moshave së bashku me Maurizio Viscidin.

Në fund, Malagò vlerësoi edhe qëndrimin e Roberto Mancinit dhe Claudio Ranierit: “Të dy treguan ndjeshmëri të madhe edhe në aspektin ekonomik, duke marrë parasysh kufizimet e buxhetit”.