Nga grumbullimi i kombëtares kuqezi në Austri, ku po përgatitet për finalet e “Euro 2024”, ka dalë në konferencë për shtyp Taulant Seferi. Një nga më meritorët e fushatës kualifikuese në grup, tetovari nënvizoi para gazetarëve të pranishëm si më poshtë:
Si është ndjesia për Europianin që po afron?
Gjatë kësaj periudhe kemi punuar shumë, me intensitet të lartë. Është një ndjesi shumë e mirë, jemi krenarë që përfaqësojmë ngjyrat e kombit tonë. Më e rëndësishmja është se jemi bashkë dhe të lumtur, mezi po e presim Europianin.
A po rritet konkurrenca në sulm?
Arbër Hoxha është një talent i madh dhe me shumë cilësi. Jam i lumtur që ka ardhur të luajë për Shqipërinë, konkurrenca i bën mirë grupit.
A e mendoje se do të ktheheshe protagonist i kualifikimit kuqezi në “Euro 2024”?
Futbolli ka ulje dhe ngritje, por kam shikuar gjithmonë përpara. Kam punuar shumë, me ndihmën e Zotit. Shpresoj të jem në formën më të mirë dhe të jap maksimumin në Gjermani.
A e sheh Europiani si trampolinë?
Europianin nuk e shoh për kontratë, mendoj për kombin shqiptar. Ne jemi këtu për kombëtaren. Anën e transferimit nuk e mendoj, vetëm pasi të mbarojmë angazhimin me kombëtaren.
A ke ruajtur ndonjë gol për në Europian?
Ne jemi sulmues dhe duhet të shënojmë, po punojmë fort dhe jemi të gjithë mirë. Do të përgatitemi në maksimum për çdo ndeshje.
Cili rival grupi mund t’ju hapë më shumë punë?
Ndeshja nga ndeshja dallon, janë kundërshtarë të fortë. E gjitha që duhet të bëjmë është të japim maksimumin, tani e kemi mendjen tek Italia. Duhet të kemi shpirtin luftarak dhe të jemi të bashkuar, si një grup i vetëm. Nëse arrijmë këtë do t’ia dalim mirë.
Pse jeni kaq të lidhur me fanellën kuqezi?
Jemi shqiptarë, ndihemi shumë krenarë për fanellën që veshim. Është një fanellë shumë e rëndë, japim maksimumin për të fanellë. Shpresoj të marrim rezultate pozitive.
