Donald Trump dëshiron që presidenti i FIFA-s, Gianni Infantino, të bëhet Sekretari i ardhshëm i Përgjithshëm i OKB-së. Lajmi është publikuar nga “New York Post”, duke cituar burime sipas të cilave Trump beson se Infantino “respektohet nga të gjithë në botë dhe ka një aftësi të veçantë për t’i bashkuar njerëzit”. Sekretari i ri i Përgjithshëm do të zgjidhet këtë vit, pasi Antonio Guterres do të largohet në fund të dhjetorit.

Për të marrë postin, Infantino duhet të sigurojë mbështetjen e 15 anëtarëve të Këshillit të Sigurimit dhe më pas miratimin e Asamblesë së Përgjithshme. Ende nuk dihet nëse ai është i interesuar për këtë detyrë apo nëse Trump ka biseduar me të.

Sipas raportimit, Trump e sheh Infantinon si alternativë ndaj kandidatëve të tjerë, të cilët një burim i quajti “të dobët”. Mes tyre janë ish-presidentja e Kilit, Michelle Bachelet, dhe drejtori argjentinas i Agjencisë Ndërkombëtare të Energjisë Atomike, Rafael Grossi.

Me Infantinon në krye të OKB-së, Trump beson se marrëdhëniet me organizatën mund të përmirësohen, pasi ai e ka kritikuar shpesh OKB-në për mungesën e rolit në zgjidhjen e konflikteve ndërkombëtare.