Piloti italian Kimi Antonelli siguroi “pole position” në pistën e Miami, ku mbrëmjen e së dielës do të zhvillohet gara e radhës së Formula 1. Kryesuesi i botërorit dha kohën 1’27”798, duke qenë më i shpejti në pistë.

Ai do të ndajë vijën e parë të startit me holandezin Max Verstappen, i dyti me Red Bull, rezultari më i mirë deri më tani këtë sezon për 4 herë kampionin e botës. Ai arriti të lërë pas Charles Leclerc me Ferrari, i treti.

Monegasku i “kokëkuqes” do të ketë në krah, në vijën e dytë të nisjes, britanikun e McLaren, Lando Norris (i katërti). Mjaft interesante edhe vija e tretë e startit, me dy pilotë britanikë: George Russell (i pesti me Mercedes) dhe Lewis Hamilton (i gjashti me Ferrari).

Në vendin e shtatë u klasifikua Oscar Piastri me makinën tjetër McLaren, ndërkohë që në “top-10” janë edhe Franco Colapinto, Isack Hadjar dhe Pierre Gasly. Gara të dielën ka një paqartësi në lidhje me kushtet atmosferike, pasi priten reshje shiu.