Mund të humbasësh, po, por duke provuar të luash të paktën. Argjentina, e dalë e shkatërruar nga finalja me Spanjën, nuk e bëri këtë dhe humbi me të drejtë. “Furitë e Kuqe” dominuan totalisht dhe fituan me diferencë minimale vetëm falë një Dibu Martínez të madh. Portieri, që është pranë një transferimi te Juventusi, shpëtoi “Albiceleste” e Scalonit, e cila, pas një pjese të parë të ekuilibruar, mendoi vetëm për t’u mbrojtur.
Në fund, drejtësia shpërbleu atë që vërtet provoi të krijonte, të luante futboll në një finale që sigurisht nuk do të mbetet në histori, përveçse për lotët e Messit pas vërshëllimës së fundit. Në fund të fundit, për të dhuruar spektakël duhet të jenë dy skuadra. Kështu nuk ndodhi.
Strategjia e Scalonit, i cili gaboi të gjitha zgjedhjet e mundshme (nga aktivizimi i Nico González që nga fillimi deri te mosfutja e Lautaro Martínez, një nga lojtarët më në formë), penalizoi Lionel Messin, i cili shpresonte të fitonte Botërorin e dytë radhazi për të shkruar historinë. Në fund të fundit, “Pleshti” preku shumë pak topa, viktimë e strategjisë së gabuar të trajnerit të tij.
Tani edhe ai “Top i Artë”, që dukej se ishte tashmë i destinuar të shkonte në shtëpinë e Messit, mund të përfundojë diku tjetër. Mes gazetave ndërkombëtare, ishte “L’Equipe” ajo që bëri analizën më të ashpër ndaj “Albiceleste”:
“Argjentinës nuk do t’i duhej një mrekulli për të fituar, por grabitja më e madhe në historinë e finaleve të Kupës së Botës, sepse kampionët në fuqi as nuk luajtën, as nuk sulmuan dhe, duke e çuar ndeshjen në terrenet e tyre të preferuara helmuese, nuk ekzistuan”.
Fjalë të rënda, por të vështira për t’u kundërshtuar. Sidomos nëse shihen disa të dhëna të ndeshjes së luajtur në “MetLife Stadium”. Argjentina ishte skuadra e parë në historinë e Botërorit që nuk bëri asnjë goditje në portë në një finale. Vetëm Messi dhe Simeone gjuajtën në fund të kohës shtesë, por pa e vënë në provë Unai Simón.
Ka edhe më: deri në minutën e 117-të, xG-ja, pra indeksi i rrezikshmërisë në zonën sulmuese i Messit dhe shokëve të tij, ishte zero. Po ashtu, vetë Messi, në 15 minutat e para të lojës, nuk preku asnjë top.
Në shumë të dhëna të ofruara nga Opta bie në sy edhe kjo statistikë: nga 900 ndeshje të analizuara nga viti 1966 e deri më sot, vetëm tri skuadra nuk kanë bërë asnjë goditje në portë në një ndeshje të Botërorit. Argjentina e djeshme, pikërisht, dhe Kosta Rika kundër Spanjës (2022) dhe Brazili (1990).
Shumë tregon edhe fakti që futbollisti argjentinas që preku më shumë topa ishte Dibu Martínez, më i miri në një Argjentinë që u dyfishua nga Spanja në pasime dhe që pati zotërim topi prej 65%. Pra, fitorja e “Furive të Kuqe” ishte e pastër dhe mesazhi i qartë: vetëm me grintë e karakter nuk fitohet asgjë.
¡¡VAMOS, LIONEL QUERIDO!!
Scaloni cerró la conferencia de prensa con lágrimas de emoción. #MundialEnDSPORTS#FIFAWorldCup pic.twitter.com/sZ9yBE2gf4
— DSPORTS (@DSports) July 19, 2026
