Çfarë i ka munguar PSG-së për të shkuar në finale e “Wembley”? Kylian Mbappé i është përgjigjur kësaj pyetjeje pas humbjes kundër Borussia Dortmund në ndeshjen e dytë gjysmëfinale të Ligës së Kampionëve. Një disfatë që i dënoi parizienët me eliminim:

“Duhet të kishim shënuar. Ne i kishim mundësitë, por kur nuk je efektiv është e vështirë të kalosh. Jo çdo gjë duhet hedhur tutje. Kjo skuadër ka dhënë shumë, jemi përpjekur t’i bëjmë krenarë të gjithë tifozët, por nuk mjaftoi. Tani duhet të vazhdojmë të punojmë, sepse kemi ende një finale (“Coupe de France”, më 25 maj kundër OL), është objektiv i rëndësishëm”.

A ishte Borussia Dortmund më e fortë?
Nuk e di, nuk ka nevojë të denigrojmë kundërshtarin, secili do të bëjë analizat e veta. E vërteta është se gjermanët na sulmuan një apo dy herë dhe shënuan, ne shpesh hynim në zonën e tyre dhe nuk ia dolëm. Ky është një fakt i pamëshirshëm, edhe pse nuk më pëlqen shumë të flas për fatin e keq.

A e mbani veten përgjegjës për këtë eliminim?
U përpoqa ta ndihmoja ekipin tim sa më mirë që munda. Nuk ishte e mjaftueshme. Kur flasim për efikasitet, po flasim edhe për mua. Unë jam ai që duhet të shënoj gola dhe të jem vendimtar. Nëse gjërat shkojnë mirë, unë marr gjithë dritën. Kur gjërat nuk funksionojnë, unë i marr të gjitha hijet, kjo është jeta.

Si e vlerësoni sezonin?
Nëse bëjmë një bilanc, duke marrë parasysh projektin me të rinjtë, mendoj se nuk shkoi aq keq. Te PSG gjithmonë duam të fitojmë. Jemi të trishtuar, e përsëris, tani duhet të fitojmë “Coupe de France”. Të bëjmë analiza përfundimtare sot nuk do të kishte asnjë kuptim.