Pas fitores bindëse 3-0 të Brazilit ndaj Skocisë në Kupën e Botës 2026, protagonisti i mbrëmjes ishte Vinicius Junior, autor i dy golave që i siguruan “Seleçaos” vendin e parë në Grupin C. Sulmuesi i Real Madridit shënoi një nga golat e tij me kokë, diçka jo shumë e zakonshme për profilin si futbollist, dhe pikërisht ky detaj u kthye në temën kryesore të deklaratave pas ndeshjes.

Me buzëqeshje në fytyrë, Vinicius zbuloi një bast të vogël me trajnerin Carlo Ancelotti: “I premtova trajnerit se do të shënoja me kokë. Ai më tha se kjo ishte pothuajse e pamundur dhe se do të më bënte një dhuratë nëse do ta arrija. Tani jam duke pritur…” Deklarata shkaktoi të qeshura mes gazetarëve, ndërsa braziliani vazhdoi me tone shakaje duke i kujtuar trajnerit italian premtimin e bërë.

Përtej humorit, Vinicius u shfaq i kënaqur me paraqitjen e skuadrës, duke theksuar rëndësinë e fitores dhe të vendit të parë në grup: “Bëmë një ndeshje shumë të mirë, luajtëm me intensitet dhe krijuam shumë raste. E dinim sa e rëndësishme ishte ta mbyllnim grupin në krye. Jam i lumtur për golat, por mbi të gjitha për mënyrën se si luajti ekipi”.

Brazili e mbylli fazën e grupeve me një fitore të pastër ndaj skocezëve, ndërsa Vinicius konfirmoi formën e tij të shkëlqyer, duke qenë një nga liderët e skuadrës së Ancelottit në këtë Botëror. Tani mbetet për t’u parë nëse trajneri italian do ta mbajë fjalën dhe do t’i japë sulmuesit dhuratën e premtuar.