Pas barazimit me Marokun, Brazili u rikthye te fitorja 3-0 ndaj Haitit. Trajneri Ancelotti u shfaq i kënaqur: “Zhvilluam një ndeshje të plotë. Në pjesën e parë luajtëm shumë më mirë, ndërsa në të dytën e kontrolluam lojën.

Pas rezultatit 3-0 e ulëm ritmin, por krijuam shumë raste, mund të kishim shënuar edhe më tepër. Ishte pikërisht ajo që prisnim: më shumë cilësi, më pak gabime, më shumë efikasitet në sulm dhe kontroll në mbrojtje. Pashë atë që doja, po përmirësohemi,  do të përmirësohemi edhe më shumë”.

Ancelotti vlerësoi Cunha dhe Vinicius: “Matheus ishte fantastik, i shkaktoi shumë probleme mbrojtjes së Haitit. Ishte vdekjeprurës para portës. Vinicius ka ardhur në formë të shkëlqyer, por ne nuk duam që ky të jetë Botërori i tij; duam që të jetë Botërori i Brazilit”.

Trajneri shpjegoi edhe ndryshimin taktik të Vinicius, i cili luajti më në qendër, duke i lënë krahun Douglas Santos, ndërsa në të djathtë Raphinha dhe më pas Rayan siguruan më shumë ekuilibër mbrojtës.

Brazili kryeson grupin dhe është pranë kualifikimit: “Duhet të përmirësohemi edhe më shumë për fazën me eliminim direkt”. Për sfidën me Skocinë tha: “Duam të fitojmë për ta mbyllur grupin në vendin e parë. Nuk do të jetë e lehtë, ndaj duhet të ruajmë qetësinë dhe përqendrimin”.

Në fund, ai konfirmoi se Neymar do të stërvitet individualisht dhe do t’i bashkohet grupit të hënën, duke qenë gati për ndeshjen ndaj Skocisë.