Laçi ka flirtuar me fitoren minimale ndaj Apolonisë deri në minutën e parafundit të kohës së rregullt. Kur thuajse kishte nisur festa e kapjes së vendit të parë të Superiores, vjen ndëshkimi i madh. Diop barazon rezultatin në minutën e 89-të, pas një dalje amatoreske të portierit Sherri, dhe iu ngrin buzëqeshjen vendësve. Të paktën derisa të mbarojë supersfida përmbyllëse e javës së 23-të të Superiores, Vllaznia-Kukësi, e cila starton në orën 16:00, në “Loro Boriçi”, kreu është me tri koka: Vllaznia, Teuta dhe Laçi.

Kurbinasit kanë krijuar shumë, por kanë vuajtur në finalizim. Duhej të hidhej në fushë Mazrekaj, me fillimin e pjesës së dytë, që prej këmbëve të tij të dilte një asist, i shndërruar në gol nga Shehu në minutën e 47-të. Fierakët kanë bërë qëndresë të admirueshme, sidomos me portierin e tyre, derisa ia dolën të merrnin një barazim “in extremis” në këtë transfertë të vështirë. Nga ana tjetër, skuadra e Shpëtim Duros nuk e shfrytëzoi më së miri hapin fals të dy rivalëve të tjerë për kreun dhe titullin, të konsumuar dje nga Teuta dhe Partizani.

Durrsakët barazuan në Ballsh, ndërsa të kuqtë u mposhtën si pritës nga Skënderbeu. Barazimi konsiderohet doemos gabim për Laçin, sepse për fare pak minuta lojë mund të kishin dy pikë më tepër se Vllaznia. Kjo e fundit, edhe me situatën aktuale të renditjes, vihet edhe më shumë nën presion. Shkodranët duhet të mposhtin Kukësin, që të kryesojnë të vetëm edhe pas këtij “stacioni” të garës.