Pavarësisht se Michael Olise është dëshira e madhe e Florentino Perez, drejtuesit e Real Madridit janë shumë të qartë për një gjë: nuk do të krijojnë asnjë konflikt me Bayern Munich, për këtë rast.

Klubi madrilen arriti një marrëveshje me Bayern Munich se do t’i njoftojë ata për çdo veprim që do të ndërmarrin në lidhje me Olise, dhe ata nuk do të devijojnë nga kjo marrëveshje.

Marrëdhëniet midis dy klubeve janë të shkëlqyera, dhe Real Madridi nuk dëshiron që ato të tendosen nga Olise. Prandaj, nëse lojtari nuk bën një lëvizje nga ana e tij, e cila duket e pamundur sipas raporteve në Gjermani, Real Madridi nuk do të lëvizë gishtin për të nënshkruar me francezin.

Duke qenë se Bayern Munich është i vendosur për të mos lejuar largimin e Olise as për shifrën 200 milionë euro, te Real Madrid janë të vetëdijshëm që të paktën këtë verë transferimi i Olise nuk ka shanse që të ndodhë.