Skuadra angleze e Aston Villa mbetet surpriza e këtij edicioni në Champions League, duke shkuar në fazën çerekfinale. Të besuarit e trajnerit Unai Emery do të përballen sot me PSG, në një përballje aspak të lehtë me kampionët e Francës.

Trajneri i Aston Villa, Unai Emery, në prag të ndeshjes tha: “I yni është një klub historik dhe kur mbërrita këtu e dija historinë e tyre. Kjo e sotmja do të jetë një ndeshje shumë e veçantë për të gjithë ata që mbështesin Villa”.

“Do të jetë një sfidë e madhe për mua dhe lojtarët e mi, por ne kemi besim. Do të përpiqemi të shfrytëzojmë maksimumin nga të gjitha mundësitë tona“, shtoi më tej Emery.

Ai foli edhe për të kaluarën e tij në Paris: “Kam kaluar dy vjet në Paris, ndihem mirë që jam kthyer. Është hera e parë që kthehem”.

“Është shumë e veçantë për mua dhe jam shumë krenar për mënyrën se si po kthehem këtu, duke luajtur me Villa në Champions League. Do të përpiqem ta shijoj këtë çerekfinale”, tha Emery.