Skënderbeu nuk ka bërë ende lëvizje në merkaton e janarit, duke pritur rastin e duhur për të afruar ndonjë lojtar cilësor, ndërsa tashmë duket se e ka gjetur një të tillë.

Ditët e fundit mesfushori nga Kosova, Xhevdet Gela, ka qenë në bisedime me disa klube në Superiore, por garën e ka fituar Skënderbeu, që ka kënaqur edhe kërkesat financiare të futbollistit, i cili nuk është i lirë.

Bëhet fjalë për një futbollist 29-vjeçar, i rritur në Finlandë, ku luan prej më shumë se një dekade, ndaj aventura shqiptare është e dyta për të jashtë Finlandës si futbollist, pas pak muajsh në Poloni tek Widzew Lodz, në fillim të vitit 2014.

Mesfushori organizator, mjaft teknik dhe i zoti me gjuajtjet nga distanca, Gela shënon disa gola çdo sezon, por mbi të gjitha te Skënderbeu e duan për të marrë përsipër organizimin e lojës, rol ku janë përshtatur nga halli lojtarë të ndryshëm dhe vetëm Muzaka e ka bërë si duhej.

Sezonin e shkuar Gela ishte titullar te Lahti, ndërsa para ndërrimit të viteve firmosi për HIFK po në Finlandë, klub ku ka luajtur edhe në vitet 2016 e 2017.

Gjithsesi, Gela kishte marrëveshje për prishje kontrate me HIFK në rast oferte nga jashtë dhe tani gjen marrëveshjen me Skënderbeun. Brenda pak ditësh priten firma dhe prezantimi në Korçë.