Trajneri i Chelsea, Enzo Maresca, tha se skuadra e tij nuk duhet të mbështetet vetëm te Cole Palmer nëse duan të vazhdojnë formën e tyre të shkëlqyer të kohëve të fundit. Skuadra londineze ka befasuar të gjithë, duke qenë e vetme në vendin e dytë në Premier League.

Palmer është bërë një nga golashënuesit më të mirë këtë sezon në Premier League. “Unë e kam thënë disa herë se nëse duam të jemi protagonistë këtë sezon nuk mund të mbështetemi te Cole për çdo ndeshje, sepse nuk është korrekte”, tha Maresca.

“Ai duhet të shijojë futbollin, por nëse e përgatisim sezonin duke menduar se Cole është zgjidhja e vetme, e kemi gabim”, shtoi më tej trajneri italian, që kërkon më shumë edhe nga pjesa tjetër e skuadrës.

“Natyrisht që ne punojmë çdo ditë për të mundësuar që Cole të jetë në situata ku ai mund të jetë më i miri. Ju shikoni që ne e kemi zhvendosur atë nga ana e djathtë në anën e majtë, sepse ne duam të vendosim lojtarët në situata ku ata mund të japin më të mirën e tyre”, tha Maresca.