Pas një përjetësie, e përkthyer në 8 ndeshje rresht pa fitore, Tirana shijon suksesin që e kishte harruar, aq sa po shihte makthe me emrin "Kategoria e Parë". E tepruar, por ashtu u tha edhe para dy vitesh dhe e pamë si përfundoi.
Sot bardheblutë kanë fituar një finale të vogël kundër Kastriotit, duke triumfuar 4-0 dhe duke mos vuajtur asnjëherë.
Një ndeshje e dominuar, e zgjidhur shpejt, sepse në minutën e 11-të Sentamu u ndal me faull nga portieri Kuka dhe Edon Hasani shënoi golin e epërsisë.
Më pas asnjë problem për bardheblutë, sepse Kastrioti nuk i bezdisi dhe në minutën e 42-të Grent Halili krijoi golin e sigurisë, shënuar nga Bedri Greca.
Pjesa e dytë u administrua qetësisht nga Tirana, që aktivizoi edhe rebelin Michael Ngo'o dhe anglezi në minutën e 78-të thelloi avantazhin, pas një pasimi të bukur marrë nga Hasani.
Në fund lavdi edhe për Sentamu, me afrikanin që shënoi golin e katërt në sekondat e fundit të kohës së rregullt.
Një fitore qetësie për të gjithë në kampin bardheblu, sepse tashmë zona e ftohtë është 4 pikë larg dhe trajneri Ardian Mema shijon suksesin e parë në drejtim.
Kategoria Superiore – Java 16
TIRANA – KASTRIOTI 4-0
Shënues: Hasani 11′, Greca 42′, Ngo 78′, Sentamu 90′
Tirana: Abibi, Doka, Atinga (Turtulli 74′), Hoxhallari, Imami, Karabeci, Daja, Hasani, Halili (Ngo'o 67′), Greca (Mauejje 71′), Sentamu. Trajner: Ardian Mema. Të gatshëm: Lika, Blazhevski, Cake, Kërçiku.
Kastrioti: Kuka (Puja 46′), Husein (Bardhi 28′), Shehi (T. Marku 66′), Çela, Stijepovic, Domgjoni, Ymeraj, Okebugu, Shehu, H. Marku, Roxher. Trajner: Stavri Nica. Të gatshëm: Atsina, Caca, Neziri.
Kartonë të verdhë: Sentamu 50’/ Kuka 10′, Ymeraj 66′
Gjyqtarë: Laver Alla, Rudin Preça, Marjus Qose, Olsid Ferataj
Telesport është krenar që bashkëpunon me Krowd9, një aplikacion fantastik i futbollit për shqiptarët! Shkarkojeni > bit.ly/krowd9 për video me përmbledhje ndeshjesh, njoftime të menjëhershme për golat dhe të gjitha lajmet e Telesport! Krowd9 është i përdorshëm në shqip, italisht dhe anglisht.